Divê Ewropa dagirkeriya dewleta Tirk bide sekinandin

Parlementerên Koma Dostaniya Kurdan li Parlementoya Ewropayê daxuyaniyek dan û diyar kirin ku dewleta Tirk bi SÎHA’yan sûcê şer dike û divê saziyên Ewropayê li hemberî dewleta Tirk têkevin nav hewldanan.

Parlementerên Koma Dostaniya Kurdan li Parlementoya Ewropayê li hemberî êrişên bi SÎHA’yan ên li ser Kurdan civîneke çapemeniyê lidarxistin.

Françoîs Alfonsî (Partiya Keskan a Ewropayê), Andreas Schîeder (Partiya Sosyalîstên EWropayê), Nîkolaj Vîllûmsen (Çepgiriya Yekgirtî ya Ewropayê) û Nûnerê Rêveberiya Xweser a Bakur û Rojhilatê Sûriyeyê yê li Fransayê Xalid Îsa tevlî civîna li Parlementoya Ewropayê bûn.

29 CARAN BI ÎHA Û SÎHAYAN ÊRIŞ HATE KIRIN

Nûnerê Rêveberiya Xweser a Bakur û Rojhilatê Sûriyeyê yê li Fransayê Xalid Îsa xwe spart daxuyaniyên fermî yên Fermandariya QSD’ê û diyar kir ku dewleta Tirk ji sala 2019’an û vir ve li ser sînorê Rojava 32 caran bi çekên giran û 29 caran jî bi ÎHA û SÎHA’yan êriş kirine. îsa got “Di van êrişand e 185 şervanên QSD’ê şehîd bûne, 13 şervan jî birîndar bûne. Di van êrişan de 17 kesên sivîl jî hatine kuştin. Ev êriş bêtir li rojavayê Girê Spî, derdora Rêya M-4, derdora Zergan û Til Temirê hatiye kirin.”

DIVÊ ZEXT WERIN KIRIN

Parlementer Françoîs Alfonsî jî diyar kir ku artêşa Tirk û desthilatdariya heyî Sûriye, Rojava, Iraq û Şengal di serî de dixwaze hemû qadên Kurdan dagir bike û got “Ev êrişên dewleta Tirk ji bo Ewropayê jî gefeke mezin . Divê Ewropa dawî li vê pêvajoyê bîne. Divê Ewropa bi lezgînî zextên ekonomîk û dîplomatîk bide destpêkirin.”

Andreas Schîeder jî diyar kir wekî li Efrînê paqijiya etnîk tê kirin û got “Tirkiye qanûnên navneteweyî bin pê dike û sûcên şer dike. Bi vî tiştî re mirov ji neçarî koç dikin.Ev rewş nayê qebûlkirin. Divê li hemberî Tirkiyeyê tevdîr were stendin.”